Paśla niadaŭniaha raskryćcia strašnaj tajamnicy, jak zrabić biełarusaŭ biełaruskamoŭnymi, ja niešta padumaŭ, što kali jany ŭžo pačnuć havaryć na svaich tarakašmaŭkałacinkakitabach, pajavicca nieabchodnaść pryčasać usio hetaje strakataje bahaćcie. Dy, što tam „pajavicca”, jana daŭno jość! Heta adna z prykmietaŭ siońniašniaj žyvoj biełaruskaj movy, jakuju vyvučali chto jak i dzie moh, i jakuju mnohija tak i nie davučyli. A karystacca chočuć i lubiać, što ŭžo samo pa sabie plus. Nabytak.
A kolki ž pytańniaŭ pajaŭlajecca adrazu ž paśla taho, jak čałaviek uśviadomić sabie ŭsio bahaćcie hetaha svajho nabytku! A dzie ludziam šlifavać svaju movu? Jość, viadoma, livejournalnaja by_mova, ale heta chutčej hide park na temu movy, čym aŭtarytetnaja krynica infarmacyi, jość (nia tolki ŭ siecivie) šmatlikija słoŭniki, ale nia ŭsie ich majuć, i nie na ŭsie pytańni słoŭniki dajuć adkazy. Dy j niama ŭ kaho zapytacca. Dy j soramna. Adsiul šyroka raspaŭsiudžanaja pazycyja: havaru (pišu) jak mahu j chaču. Nie padabajecca — idzicie na… (nie čytajcie).
Ja j sam čaściakom sutykajusia z pytańniami, adkazu na jakija niama pad rukoj. Ja nie ekspert. A voś fajna było b mieć resurs, dzie časta zadavanyja pytańni z praktyki biełaruskaj movy byli b nia tolki zadadzienyja (jak u by_mova), ale j mieli b aŭtarytetnyja adkazy. Z padziełam, naprykład na katehoryi, z pošukam, rss-am itp. FAQ.
Ja davoli daŭno saču za pracaj peŭnaj ustanovy pry sajcie PWN. Šykoŭnaja inicyjatyva, skažu ja vam! U palakaŭ, praŭda, inšaja sytuacyja: niama takoha „bahaćcia vybaru” pravapisaŭ, i ŭsie jany polskamoŭnyja-polskaadukavanyja, i ŭ bolšaści svajoj razumiejuć, što kali čahości nia viedaješ, dastatkova zapytacca ŭ ekspertaŭ (a nie prydumlać samomu i namaŭlać inšych pryniać tvajo vynachodžańnie jak fakt). I jany majuć u kaho zapytacca. I im navat adkazvajuć.
Nam taksama takoje treba, ja dumaju. Ja navat dumaju, što viedaju niekatorych ekspertaŭ, jakija nie admovili b u dapamozie.
